Берпумети гожтэт.........................................................

Марке ваньмыз алама луыны кутске кадь. Гожъямъёсме блоге "херня" шуо. Уг быгатиськы гожъян видать. Ну ладно озьы ке.
Комп тияськемын, гожъян немарин да и марлы.
Телефон тияськын кутскемын.
Поступлениен валамон овол на. Но тоже хреново.
Номырно уг пормы лэсьтыны.
Мар верасько кылэм уг каро.
Мукетъёсыз понна улисько.
Всё.

«Ури-Бери» тон мар дауртиськод?

Мар ке удмурт Рэпер «Ури-Бери»-лэн куараез уг чирды ини. Мар луиз? Оло Москваын ваньзэ ыштӥз шат? Рифмаос уг ни-а мар-а кыл йылаз пыро? Соин мон аська пыр сое вераськонлы вуттӥ. Эн пайме «Ури-Бери» сыӵе чебер но чебер вераське шуыса удмурт сямен. Со ваньмыз удмурт кылэ берыктэмын, но чебер гожтэмын мынам киыным. Нош валтӥсь малпанэз ваньмыз кылиз.
-Санко-Батыр: «Ку Иж каре тон бертод? Тон мар кырӟамысь дугдӥт? Ку выль трэкъёсыд потозы ини?»
-Ури-Бери: «Али уг тодӥськы ай ку берто, но ку выльёсыз потозы. Кырӟанъёс сярысь али ӧвӧл ай, поступать кароно ай. Мыным ... эстрада вылэ, со хобби».
-Санко-Батыр: «Марлы со тыныд Муско?»
-Ури-Бери «Карьера, коньдон. Одӥг эмоциос вылын улыны кулэ ӧвӧл. Татын вань ваньмыз астэ ӝутон понна. Иж карын НЕМАР карыны. БЛАТ котькытын но кулэ, умой интыосы пырыны. Кин монэ отчы пыртоз, ваньзы асьсэлэсь пиоссэз пырто. Иж карын уж но ӧвӧл, коньдон но ӧвӧл. Но за то тусовка но шулдыр.  Нош Москваын мон быгато трос уксё лэсьтыны но, умой улыны аслам Челныям.»
-Санко-Батыр: «Но всё-таки ку луозы ини выль трэкъёс? Тросэз ини возьмало.»
-Ури-Бери «Трэкъёс луозы. Али пырыны гинэ пока кулэ, нош собере со сярысь ини малпаськын. Мон кинлыке тунсыко-а мар ай? Уд алдаськы-а? Ооо, озьы ке мон гожъяло»
Озьыен «Ури-Бери» улӟьытэмын. Возьмалэ гудырикошкон толэзе выль кырӟанъёс. 

Контакт огин Удмуртлык.

Вуоз ини кӧня ке улыса та контактысь огинлы ньыль ар. Туж дано нунал. Куд-огъёсыз уг но тодо дыр ай "Удмуртлык" огин вань шуыса, куд-огъёсыз отысь котькуд нунал ивор тодо, куд-огъёсыз та огин мед улоз шуыса, иворъёс отчы лэсьтыло.

Та нуналлы огинэ ВИТЬ СЮРС адями пыриське ини.Со бадӟым шумпотон огинлэн кылдытисьёслы. 

Марлы та огин кулэ? Та огин кулэ аслаз шаплы ивор сётэменыз. Котькуд кыӵе ке удмурт яке мукет кыӵе ке ужрад луэ ке, со котьку нырысь ик "Удмуртлык" огинын возьматӥське. 

Маиныз мыным кельше? Кельше соиныз, та огин монэ палэнэ уг кельты шуыса, со мынэсьтым блогысьтым гожтэм амалме котьку калыке поттэ. Но озьы ик кельше татысь оло кыӵе ивор шедьтыны, мукет адямиосын тодматскын, трос ваче вераськонъёсы пыриськыны. Озьыен та бадӟым инты, кудаз котькудӥз ватӥськытэк, возьдаськытэк быгатэ аслэсьтыз кылзэ вераны. 

Нош маин юрттын быгато? Али Иж карын улыса тань туж трос пайда ини аслым но та огинлы но ваисько. Выль иворъёс кылдытъясько. Нош зэмзэ ке вераса, та огинын пуко сыӵе админъёс, кудъёсыз иворъёсты котькинлэсь вазьгес потто калыке. 

Озьыен та данлыко огин. Со ваньзэсты огинэ бича. Со ваньзылы иворъёс сётыны турттэ. Туж умой со. Мед котьку улоз та огин, мед котьку выльдӥськоз эшшо маиныз ке.

Удмурт нылъёс Иж карлы пайда ваё

Куамын аръёс ӵоже Пионер Юрт вӧзын стадион кыллиз вал ас дуннеяз. Кармылэн вылӥ пукисьёсмы кизэс но уг йӧтто вал та стадионэз тупатон понна.

Нош вылэм на туала аръёсы нылъёс, кудъёсызлэн сюлэмзы висе сыӵе куштэм, нокинлы кулэтэм интыос. Озьыен удмурт кылбурчи Каталинка Эмырова но удмурт кырӟась Эльвира Панченко огазе кариськыса малпаллям таӵе ужрад «Стадион пинал дырмылэн». Соос адӟиллям та стадионлэсь умой азьвыл сюрессэ.

Кармылэн вылӥ пукисьёсмылэсь номырзэс но курытэк, асьсэлы нокыӵе пайда, коньдон солэсь басьтытэк,  бичаллям асьсэос калык стадионэз утялтон понна, выльдон понна. Озьы соос калык люкаса вить КАМАЗ машина кулэтэм арберизэс отысь поттиллям. 

Стадион чылкак воштӥськиз. Нокин но ӧз кожасал татын ортчытъян луоз шуыса пиналъёслы кыӵе ке ӵошатсконъёс, шудонъёс. Тупен шудон пиналъёслы но бадӟымъёслы: волейбол яке футбол. Кыче ке рок фестиваль ортчытыны. Нокин тае син азяз но нырысь уг быгаты вал пуктыны. Но со понна ик удмурт нылъёс вань та музъем вылын. Соос син азязы адӟем гинэ ӧз каре но, ваньзэ сое быдэстыны но тыршизы. Озьыен стадион выльдэмын, стадион нош ик шокчиз выль омырен, стадион нош ик улэ. Кызь куатетӥ пӧсьтолэзе луоз солэн выльысь вордскем нуналыз.

Уксё понна гинэ туала улоно ӧвӧл. Коньдон поттон сярысь гинэ малпаськоно ӧвӧл марке лэсьтӥськод ке. Нырысь малпаськоно кыӵе со пайда ваёз ваньзылы, нош аслыд шумпотон ваиз ке со туж умой ини луоз таӵе ужрадъёсын.

Та ужрад трос калыкез но огазьяськонъёсты бичаз ас дораз, но туж пайдаё лэсьтэмын вал.

Но кыле на юан асьме карлэн вылӥ пукисьёсмылы: «Марлы соос со ужрад пумысь ноку ӧз малпаське?»

Иж кар воштӥськоз, нош Гельман юрттоз.

Алигес Ижкарын ортчиз фестиваль «Теория Относительности». Отчы ветлылӥз Марат Гельман.

Кин сыӵе со Марат Гельман? Нырысь кӧня ке ачиз сярысь. Марат Александрович Гельман вордӥськиз 24-тӥ  толсуре 1960-тӥ арын Кишенёв карын, туж сиё-дано советской драматурглэн но сценаристлэн Александр Гельман семьяын.

Нош али со ужа искусствовед, публицист, политтехнолог но галерист луыса. Озьыен со али ки ужа Пермь улосын. Отын  со выре карлэн азинскеменыз. Карзылы возьматын тырше кызьы шонер улоно шуыса туала вакытэ. Ортчытъя оло кыӵе но ужрадъёс, выставкаос. Озьыен со выль омыре Пермь калыкез пыртын турттэ.
  
Азьланяз тырше ас пытьызэ кельтын Удмурт Элькунамы но.  Нырысь кутскон пытьы лэсьтӥз ини. Алигес ветлӥз вал Иж карамы ортчытын «Культура но политика» конференция. Отын со ас малпанъёссэ вераз мар эшшо кулэ на карыны Иж карамы. Со сётӥз таӵе малпан: «Иж кар но Удмурт Элькун нырысь тодмо аслаз Калашников автоматэныз. Но  али сое сыӵе ик кулэ уг каро ини. Соин соослэсь кулэ кыӵе ке сувенир пӧрма  лэсьтылыны» . Но со одӥг гинэ сыӵе малпанэз ай асьме Элькунэ лыктэм бераз. Оскисько, эшшо но трос луозы шуыса Иж карамы воштӥськонъёсмы.
   
Иж кар воштӥськон пала выжоз, мон оскисько.

Кузебай Герд. Ми кизиськом.

Кузебай Герд.

Ми кизиськом.

Ми гыриськом, кизиськом!

Араны егит муртъёс лыктозы,

Шумпотыса бусыосы лыктозы…

Ми гыриськом, кизиськом!

Кизем кылбуръёсмы,

Борддор кадь, сюрес дуре жутскозы…

Някыръяськозы, весь чашетозы

Кизем кылбуръёсмы.

Ми гыриськом, кизиськом!

Араны егит муртъёс лыктозы.

Уз лёгалэ, аралозы,

Луд  тыр чумолё пуктозы…

Соин ик

Ми гыриськом, кизиськом!

а нош эшшо кыче ке кылбур кулэ ке, одно ик вералэ мыным.

Иж каре нош ик тань вуи. оло кытчы но ветли, но тачеяз ой на ветлы вал на.

Нош ик монэ мынам туж усто ивортӥсе Шкляев Олексее ивор сётӥз. Али пе, чыжетскон нуналэ ортчоз фестиваль «Теория относительности». Озьыен мон со ӧтёнэз басьтӥ.
Ветлӥ мон со фестиваль нимо бичаськонние. Куинь часъёсы отчы вуи. Ну шуо тӥледлы АмисоВотт группаез мон учкытэк, кылзытэк кыли.Но мукетъёссэ кылзыкум кылылӥ вераськемзэс соос сярысь. Кыӵе ке но Ӟуч пияшъёслэн туж кылзэмзы потэ вал соосты. Вуттӥллямтэ а то пе. Хоть на бис ке но пе кулэ вал шуыса. Туж умой кырӞанъёсыз шуыса одӥг пияш мукетызлы вераса улэ вал.
Озьыен мон мукет группаосты кылзи.
Нош ик туж усто вал "Малпан" группа. Котьку шулдыртэ, эктыны косэ ас кырзанъёсынызы. Озьы ик туж усто вал "Сайлент ву гур" группа. Но мон соослэсь уг валаськы мар сярысь соос кырӞало. Кӧня кылзиськи ини но котьку уг валаськы. Туж куаразэ золгес но валантэмгес каре Свети Ручкина. Малпан группаяз озьы ук кар со. Нош татын нылаш туж зол воштӥське. Валантэм кырзанъёсыз луо. Но кызьы Рома Васильев шуиз: «Соослэсь кырӞамзэс валаны кулэ ӧвӧл, соослэсь кырӞанысьтызы кулэ «кайф» басьтыны шудэмысьтызы, но кызьы соос сётыны быгато калыклы». Озьы ке озьы мед луоз.
Туж усто вал эшшо одӥг тодмо кибер-гебыр, кызьы соос асьсэос веразы асьсэсыз, «Босса Нова» группалэн кырӞамез. Вот тинь та "зажигала ке зажигала". Ноку солэсь концертъёссэ ӧй на адӞылы вал ай, но та нуналэ со, ваньзы пӧлысь, тужгес но золэс. Ваньзэсты шулдыртӥз, ваньзэсты пыд йылаз султын косиз. Особенно гебыр-гебыр кырӞанэз туж зол кельшиз. Малпан но кулэ ук пичи дыръёсызь кылбуръёсын кырӞан лэсьтыны.
Улӥ Новгородысь эшшо кельшиз на группалэн кырӞамез но кырӞанъёсыз. «Аляска» соослэн нимтулзы. Туж быгато та группаысь кырӞасьёс адямиосты шумпоттыны, задор, мылкыд сётыны. Мыло-кыдо кырӞанъёссы.
Туж Ӧз кельшы куке «Сода» группаез кутскизы материть карыны но оло марин но лэзьяны. Мар со луоз? Туж урод, туж урод. Эшшо трос вал юэмъёсыз. Ну юо ке юо. Нош марлы-о пиво бервыл посудаоссэз оло кытчы но куяны. Вань ук со понна жуг-жаг куян интыос. Туж урод, туж урод.
Но самой главноез тань вуиз. Нойз мс. айда номыр уг вера таиз сярысь. Асьтэос но тодкоды кыӵе соос туж зол калыкез эктон калэ вутто, шулдырто. Быдэс калык со понна гинэ вал лыктэмын. Туж трос калык вуиз.
Мар верам на потэ, мон уг тодиськы вал сомында шуыса Иж карын группаос вань шуыса. Туж умой со вань шуыса соос. КырӞан котьку но калыкез огазья.

"Шунды" быръён

Котьку но котькытын но быръёнъёс вал нырысетӥез калык пӧлын. Кионъёс быръё асьсэлы вожаксэз, адямиос быръё асьсэлы туж вылӥ кивалтӥсьсэз, президентэз. Котькуд фирмаын яке фермаын, колхозын яке совхозын, дышетскон юртын яке министерствоын аслаз азьпала нуись адямизы вань, сое одно быръё, сотэк азьлань сюрессы ноку уз луы. 

Коть кинлэн потэ дыр та улонын басьтэмез бадӟым но кузь коньдон, вылӥ кивалтӥсь интые пуксьыны. Куд-огезлэн пӧрме, куд-огезлэн уггес.

«Шунды» огазьяськонлэн но кивалтӥсез вань. Со но вошъяське одно. Но марлы ке но нокинлэн уг поты мынэмез кивалтӥсе та огазьяськонлэн. Нокыӵе споръяськон, ӵошатскон но ӧвӧл валтӥсь пуконэ пуксьыны. Кин ассэ калык пӧлын возьматыны быгатӥз умоен, сое гинэ каро, пукто валтӥсе вылӥын пукисьёсмы. Нош мар со кароз азьланяз? Нош ик уг тодӥськы. Солэн нокыӵе азьпал сюрессэ «Шунды» огазьяськонлы возьматэмез но уг луы, кыӵеен со адӟе азьпал сюрессэ, кыӵе мар ужрадъёс орчытъяськозы солэн малпамезъя выльёсыз, но кызьы пиналъёслы «Шунды» огазьяскон сярысь ивортоно, мед ваньзы тодозы шуыса, но кызьы «авторитетсэ» ӝутоно калык азьын. Мон шӧдӥсько, нокыӵе сыӵе разделъёслы вылӥ пукисьёс ӧз юалляське выль кивалтӥсьлэсь. 

Коть кыӵе ке программаосыз мед луысал котькуд кивалтӥсе мынӥсь адямилэн, мед со возьматоз мар карыны со быгатоз, кӧня со дырзэ быгатоз организационной ужрадъёслы шедьтыны, но мар выльзэ быгатоз пыртыны «Шунды» огазьяськонэ. 

Оскисько, та гожтэмме лыдзозы та быръёнъёсын ужась адямиос, но марке выльзэ карозы быръёназы «Шунды» огазьяскон  кивалтӥсе.

мон но сое ортчи

Дас одӥг классэз быдтыса котькуд ВДЮ (Вылӥ Дышетскон Юрт) усьтэ аслэсьтыз ӧсъёссэ.

Озьы усьтӥз аслэсьтыз ӧсъёссэ, мыным но мукет «абитуриент»-ъёслы ИЭДЮ (Иж карысь Эмчиосты Дышетонъя Юрт). Калыкез марке мында. Тужгес но трос нылъёс отчы вуэмын. Ми пиос вить кузя но вал-а меда соку куатьтон пӧлысь. Ну мар, вуи мон отчы. Очереде эшшо султытӥзы. Куамын укмысэтӥ луиськиз. Часысен «документъёс принимать» карыны кутскизы.  Ваньмы пыримы, возьмаськом очередьмес. Калленэн мынэ кадь шуыса азьлань весь мынӥськом. Вуиз мынам но дыры. Нош нырысь «проверить» карылӥзы «документъёсмес». Ну вот пырӥ. Учкисько но «компьюторен» ваньзэ гожъяно. Пукси но гожъяй ваньзэ мар куризы. Собере потӥ, ваньзэ кари шуыса. «О-О АЛИ ИК» озьы гинэ уд кошкай шуизы. Мукет «кабинетэ» пырыны косӥзы, отын пе сое ваньзэ «проверять» каро. Отын собере очереде нош султӥ. Ой кыӵе отын кесяськонъёс вал ук. Бигеръёс УДМУРТЪЁСЫН валче пумиськизы очередь пумысен. Милям вормиз. Интыяз бигер кышномуртэз пуктӥз. Очередь кызьы кулэ озьы ик луиз. Ну я вуиз татын но очереде. Пыри. Пуко отын, чаклало шонер гожтэмме. Собере вайыны косӥзы туспуктэмъёсме. Сое лэсьтыса ваньзэ нош вуи. Сётӥ но соослы, кошки отысь «подписьёсме» пуктылэм бере. 

Тинь со вань пырон ужрадэ мынам кыстӥськиз ньыль часлэсь тросгес дыр. Туж жади. Но уг тодӥськы ай так юнме со дыр ортчиз-а оло ӧз-а.  Кызь сӥзьым пӧсьтолэзе ваньзэ тодо ини, кытчы пырӥ, кытчы ӧй. Но мон сое ортчи.

эмчи мар со? призвание оло просто

Котькуд ар, котькуд дас одиг классэз быдтэм пияш яке нылаш быръе аслыз азьлань сюрессэ. Кытчы дышетскын пырыны, кыӵе азьланяз солэн сюресэз луоз тужгес но влиять каре профессиез.
Мон быръи аслым сюрес, профессия. Малпасько луыны пинь йонатись эмчи. Документъёсы сётэмын ини, но уг на тодкы басьтозы-а уз-а. Но оскисько пыро дыр шуыса.
Марлы мон со профессияез быръи? Малы ке шуоно мынам семьяын ӧвӧл на эмчиос, озьыен мынам потӥз луэм. Аслым но кельше со уж, семьялы но туж умой, мукетъёсызлы но.
Уд но оске дыр кызьы эшшо мынам эмчи луонэ адзиськиз. Одӥг пол шудӥ вал телефон пыр шудонэн. Нимзэ уг ни тодӥськы. Отын кулэ вал гожтын быдэскын ним тулдэ но кӧня арын вордскемын шуыса. Собере со возьматэ кыӵе тынад профессиед луоз. Мон со дыре тодӥсько ини вал мон одно эмчи луыны пыро шуыса. Мон соин кык пол шудӥ. Нырысь шудӥ мон тямыс классын. Ваньзэ кызьы кулэ гожтӥ. Уд оске мар потӥз. «ВРАЧ». Тинь озьы. Мон «ЛЕЧЕБНОЙ ФАКУЛЬТЕТЭ» заявление сётӥ.  Кыкетӥ пол шудӥ. Быдэс ар ортчиз ни вал нырысетӥ шудон азьын. Соин шудӥ мон «Шундыкар» шутэтсконниын. Озьы ик ваньзэ гожтӥ. Оскоды-а уд-а но мыным со шудон гожтӥз мон «СТОМАТОЛОГ» луо шуыса. Туж тунсыко озьы ук. Аслым но паймымон. Тинь озьы мынам эшшо но золгес потиз луэм эмчи. Мон «СТОМАТОЛОГИЧЕСКИЙ ФАКУЛЬТЕТЭ» сётӥ документъёсме.
Ма эмчи ужын калыкен но котьку вераськын луэ. Со мыным туж тунсыко. Котькуд нунал выль адями мон доры вуэ. Нош кыӵе ке вераськон кылдэ. Умой ук со.

Номырзы но ӧвӧл удмурт сямен...

Трос вотэс бамъёс туэ кылдыло вотэсын. Вань кулэтэмез но, вань кулэез но. Ачиз адями быръе кудӥз солы кулэ. Нош али выль технологиос вуизы удмуртъёс доры но.

Кылдылыны кутскизы тунсыко удмурт вотэс бамъёс, туж трос куд-огез пайда сёто, асьмелы сяна мукетъёсызлы но кин дышетэ, турттэ тодыны но валаны удмуртлыкмес, пайдаё луо удмурт вотэс бамъёс.

Алигес пырылӥ вал удмурт культуралэн, шуом озьы, туж данлыко огазьяськонъёслэн вотэс бамъёсазы. Со: «Удмурт Кенеш» http://udmkenesh.ru/, «Удмурт Театр» http://udmteatr.ru/, «Айкай» http://www.aikai-folk.com/. Мар шуэм потэ соос сярысь? Верам потэ, туж тунсыко карылэмын куиньназылэн ик, суредъёссы, туспуктэмъёссы, графиказы, но мукет чебересь калыклы лэсьтэм арбериоссы.

Но мариз умой ӧвӧл, то что соослэн удмурт кылын ӧвӧл номырзы но каремын. Шуоды «Удмурт Кенеш»-лэн лэсьтэмын? Ну озьы, лэсьтэмын. Но маиз отын вань удмурт кылын? Дак номыриз. Ваньмыз сыӵе ик. Иворзы но асьсэ сярысь ӧвӧл удмурт кылын. Вань кӧня ке, туж пичи гинэ, азь бамзы. Номыриз воштӥськемын ӧвӧл мукетыз.   Ну я «Удмурт Кенеш»-лэн коть кутсконэз вань удмуртэн. Нош мар даурто «УДМУРТ ЭЛЬКУНЫСЬ ЙÖСКАЛЫК КУН ТЕАТР» но «Айкай» вотэс бамъёс? Уг тодӥськы. Номырзы но ӧвӧл удмурт сямен. Соос удмурт кылын ватӥсько гинэ-а мар-а? Кин тодэ,кин тодэ… 

Мар мынам таин верам потэ. Шуиськод ке астэ удмурт театр, удмурт издательство, удмурт ансамбль, НУ ТОН УДМУРТ СЯМЕН ВОТЭС БАМДЭ, удмурт сямен иворты ваньзэ, оло кык сямен кар: удмурт но ӟуч но кылын - но главноез одно мед луоз УДМУРТ КЫЛЫН ВОТЭС БАМДЭС НУОН. Ӟуч сямен табере тунсыко ӧвӧл ини туала. 

Узы-Боры..........

Узы-Боры, Узы-Боры, мар отын сыӵе вань кыскисез ас бордаз, кудӥз уг лэзьы кошкын учкытэк сое? Мон уг тодӥськы. «ПарИжевск» конференцияын нош возьматӥзы вал со Петр Палганлэсь пуктэм кинозэ. Мон сое нырысь возьматыкузы ик учки вал ини. Но али тань нош пукси вал учкыны сое. Учкисько,учкисько киноез но мыным мукет интые мынны кулэ луиз. Но мынам кошкем уг луы ини. Всё, всё кошкисько ас поннам шуисько но, султын кутскисько но нош ик пуксисько. Озьы мон вить пол мында кошкын турттӥ дыр. Ас поннам шуисько али тинь та люкетозь учко но кошко. Валаськоды-а, ну нокызьы но кошкем уг луы вал, учки кадь ини но, всё равно мар ке выльзэ возьмаськод киноысь. Озьыен адӟи мон со киноез куке Максим кырӟась кизилиез Ядыгарова Викаез остановкаысь выльысь дораз ваиз. Куке соос чуть-чуть ӧз бекмылялэ. Со интыез дорозь учки, но сьӧд луиз но картина, воштиськон как раз, мон синме кыньыса сямен отысь потӥ, мукет люкетсэ медам ни адӟы шуыса. А то нош озьы ик пуксьысал но учкысал. Ну вот уг тодӥськы маиз вань та кинолэн бордаз кыскисез? Уг тодӥськы зэм но. Нокыӵе кино мынам сыӵе сюлэмам ӧз на пуксьылы. Зэм но туж кыӵе ке аспортэмлыко Удмурт Кино. УЗЫ-БОРЫ, УЗЫ-БОРЫ.........................

Конференция «ПарИжевск»

Вуи мон та конференцияе. Конференция мынэ ни вал аслаз сётэм сюресэныз. Трослы ӧй кыль мон, вить минутлы. Надежда Эдуардовна Уткина вера мар мар туннэ та конференциын луоз шуыса. Мон,  тодкоды-а, копак басьтэмын вал со ивортонэн. Кин но кытысь вуылэмын шуыса. Татын люкаськизы Швейцариысь но, Франциысь но, Москваысь но мукет интыосысь калык, визьмо калык.
Нырысь ас кылзэ веран кутскиз Москваысь культураен вырись кышномурт Князева Марина Леонидовна. Паймыса мон сое кылзиськи мар со вера. (Тужгес но умоез вал соиз, что соос вераськизы номыртэк но, нокыӵе юрттӥсь кагазъёстэк. Со вал, шуом сое, сюлмысь ваньтодэм валамзэ пазьгем кадь, но со пазьгем так юнме ӧвӧл. Со ву ӧвӧл, кудзэ вылад пазьгид но пӧсь куазь дыръя, кудӥз кӧня ке юрттэ но бырэ. Таиз вал сыӵе адямилы кадь ивортэм, кудӥз висе сахарной диабетэн, но кудӥзлы кулэ котьку но инсулин, туж кулэ ивор сётӥз Марина Леонидовна.

Со нырысь вераз азьынлыко адямиос сярысь, кыӵе соослэн улон-вылон шӧдонзы, мар соос кылзо, кыӵе кырӟанъёс. Маре соос ярато учкын, марин тунсыкъясько. Азьынлыко адямиос - кинъёс соос? Со: бизнесменъёс, азьветлисьёс, байлыко адямиос - соослэн ваньзылэн азьлань учконъёссы «оптимистической», шуг-секытэз шудон сямен ортчо, йырзэс оло марин но кулэтэменыз уг жадьыто, кулэез сярысь гинэ малпасько, но кинэн ке маке понна  уг уродъясько. Кылзӥсько классической кырӟанъёс, кудъёсыз соослэсь жадемзэс но веськатэ, кудӥз выль малпанъёс но вае, выль кыӵе ке умой ужъёс карыны сюрес сёто сямен. Озьы ик ветлыло кыӵе ке выставкаостӥ, суредъёс учкылыса. Соослэсь, суредъёслэсь, кыӵе ке выль кужым кадь  луэ  азьынлыко адямиослэн басьтэмзы. Но туж тунсыко кылъёсыз вал таӵе: « Азьынлыко адями со туж но туж художественной, солэн трос картинаос азьлань сюреслэн кылдыло, малпанъёс выль йыре пыро. Со адями, кудӥзлэн вань аслаз одӥг пуктэм меретэз, одӥг кыӵе ке ужез, кудзэ одно вуттоно пумозяз. Соос уг тэкчало одӥг ужысь мукет уже быдтытэк. Соос ваньзэ туртто лэсьтыны пумозяз».

Туж визьмо веранэз вал на эшшо культура сярысь (предисторияез таӵе солэн верамезлэн: ветлӥз вал со конференцияе Мускоын, кудзэ организовать кариз вал правохранительной органъёс. Со сӥземын вал пиналъёслы, кудъёсыз кылемын анай-атайтэк, кудъёсыз ветло ассэ понна городъёстӥ, бомжевать карыса. Соос вина но юо, тамак кыско. Мар кулэ сыӵе медаз лу шуыса люкаськиллям. Кызьы сыӵе ситуациаысь поттыны со пиналъёсты) таче кылъёс вераз со Князева Марина Леонидовна : «Ти, милемыз утисьёс, коньдон быдтӥськоды соосты кутылон понна, соосты кытын ке пытсаса возён понна. Со шонертэм. Со кулэ сётыны со уксёез кыӵе ке культурной, спортивной, художественной но мукет пайдалыко кружокъёсты радъяны, кудъёсыз юрттозы пиналъёсты шонер сюресэ поттозы». Шонер ведь верамын озьы ук эшъёс? Шонер.

Вал на мукет но вераськисьёс, но мынам потӥз верам тинь  та, асьмелэн Мускоысь визьмо кышномуртмы сярысь.

«Шунды» пиар дышетскон юртын.

Кык сюрс тямысэтӥ арын мон нырысетӥ ползэ кылӥ «Шунды» организация сярысь. Ветлӥ Можга карын «Шунды тылсиос» шутэтскон лагере. Нырысь, ну нокызьы но мынэм уг пот вал, дышетскон юртысь анае, классной руководителе, кыскиз монэ отчы. Соиз умой, мон ӧй жаля отчы ветлэмме. Олокин но мон отын вал, оло кинэ но шудӥ. Котькуд сценкаосы пыриськылӥ. Туж зол кельшиз. Озьыен соку мон пыри удмурт калык полы аслам пичи ке но, но будӥсь выжыосыным.

Мон будӥ, ветлылӥ кык пол Шундыкаре, кык сюрс укмысэтӥ но кык сюрс дасэтӥ аръёсы. Валай кыӵе мар со «Шунды» организация, мар но кыӵе  пайда со вае.
«Шунды» организация со котькудӥзлы тодмо ӧвӧл на али ке но. 

Озьыен кутски мон пичиысен, дышетскон  мынам юртысеным. Каризы дежурство огинъёсын юртамы. Кема малпаським ми кызьы соймес ниманы. Нырысь валтӥсь дежурныймылэн потэ вал оло кызьы англи кылын ниманы огинмес, но мон весь шусько вал кызьы ке удмурт кылын кароно шуыса. Пуныкай Батый вал мынам малпанэ ниманы огинмес, оло марлы, ачим но уг тодӥськы ини. Но кулэ ӧз каре со малпанме. Но собере милям тодэ лыктӥз Можга карысь шутэтскон юртмылэн нимтулыз «Шунды тылсиос». Со бере ик кутскиз со милям «пиар ход»,  «Шунды» огазьяськон сярысь дышетскон юртам ивортон.

Кутским нырысь кыӵе но мар со сыӵе «Шунды» организация, мар но кыӵе со «Шундыкар» чыжетскон юрт, кыӵе отын шудонъёсын шудо, кыӵе речёвкаосын сиськонние мыно, но мукетыз. Кинлэн потэ «Шунды» огазьяськонэ пыриськемез шуыса ивор борддор борды оши вал, мыным вералэ шуыса но мон иворто со сярысь Можгаысь кивалтӥсьлы «Шунды» огазьяськонэн. Нокин но кулэ но ӧз кары.  Пиналъёс серекъяса гинэ-а, мар-а куштӥзы сое. Мыным то мар, мон котьку оптимист. Мон валай, озьы та пиналъёсты уд ни алда туэ, сыӵе капчиен уд пырты «Шунды» огазьяськонэ. Кинлэн потэ аслыз басьтӥз дыр мае ке мар ми гожъям вал, но тросэзлы нокытчыязы но ӧз йӧты со ужрад. 

Озьыен  мукет дежурствоям мон вань классъёслэсь ним тулъёссэз удмурт кылэ берыктӥ, вань мукет но улосъёслэсь нимтулзэс берыктӥ, «Шунды» сярысь эшшо но тросгес информация сётӥ, марлы со кулэ, но мар отын карны яра но кулэ. Ивор оши кинлэн потэ «Шунды»  пыриськемез шуыса. Но озьы но уд алда вылэм та пиналъёсты. Нокин но кулэ но ӧз кары.

Мар бон кулэ на соослы? Йырвизьме берыкъяй туж зол, но мон доры интернет вуыса, мон  валай мар но кызьы карыны «Шунды» организация сярысь эшшо тросгес мед тодозы шуыса. Мон, кыӵе выль сайтъёс али потӥзы, «Шунды»-лэн но мукет сайтъёс сярысь ивор сётонъёс поттай кагаз вылэ, но ошылӥ борддор борды. Озьы ик нош оши кинлэн потэ шуыса «Шунды»  огазьяськонэ пыриськемез ивор. Нокин но кулэ но ӧз кары. 

Тань вуиз берпуметӥ дежуртсвомы. «Шундыкаре» отбор мынэ. Со сярысь ивор сётӥ мон вань пиналъёслы, аслэсьтым мар быгато юрттэт но сёто шуи вал, но нокин но кулэ ӧз кары. 

Мар мон таин веран турттӥсько, «Шунды» огазьяськонлы кызь ар ини, нош со сярысь тросэз уг но тодо ай. Шундыкар шутэтсконлы кызь палтӥ ини, нош со сярысь но нокин уг тоды. Марлы, кызьы со озьы юан кыле веран сётытэк. Эн кожалэ со мынам дышетскон юртам гинэ шуыса, со вань дышетскон юртъёсын сыӵе. 

Юан кылдэ таӵе: «Тӥ марке кариськоды-а «Шунды» огазьясконысь кивалтӥсьёс мед тодозы шуыса тӥ сярысь быдэс удмурт калык?» Номырзэ но уг шодӥськы ужаськоды шуыса.  

Удмурт кыл пыриське а котькуд урок ортчыку дышетскон юртады?

Таӵе юан куке но мыным сётӥзы вал. 

Пыриське. Котькуд урок дыръя удмурт кыл луэ вал. Малы ке шуоно ми ваньмы удмурт семьяосысь, кыӵе ке ӟуч кылэз ум ке валаське вал, милемлы удмурт сямен со кылэз валэкто вал. Озьы милемлы йыре шаплыгес но валасагез со кыл пыре вал. Котькудӥз дыр, шуом, вала ачиз анай кылыныз умой, немец адями немец  кылын вала умойгес кылъёслэсь валэктонъёссэс, ӟуч адями ӟуч кылын умой вала, англи адями англи сямен вераса умой вала, малы ке шуоно со соослэн анай кылзы, нош ми УДМУРТЪЁС умой валаськом куке милемлы кылэз валэкто удмурт сямен. Котькуд адямилэн аслаз валанэз кылъёсты, аслаз анай кылыныз. Мынам со Удмурт . Mон Удмурт кылын  трос тодон валан басьтӥсько котьку но.

Удмурт кыл дышетскон юртын.

Гожтэм потӥз аслам дышетскон юртэ сярысь.Кутском Удмурт кыл дышетон сярысь. Марлы юалоды потӥз гожтэм, малы ке шуоно мон туэ дышетскон юртме быдтӥ, но котькуд учыръёс сярысь, котькуд дышетӥсь сярысь потӥз гожтэме. Тыршо вань дышетӥсьёсы сярысь марке гожтын, мед котькудӥз сярысь тодозы кин монэ дышетӥзы, выль но кузь сюрес вылэ поттӥзы. 

Трос аръёс куспын дышетскон юртам дышетэ Чукарева Любовь Васильевна, соин артэ дышетэ вал Кутасова Нина Фёдоровна, но солэн пенсие потон дырыз вуиз. Котькуд дышетӥсь туж но туж тунсыко нуиз но нуэ ас урокъёссэ.Котькуд уроке бызьыса сямен лыктӥськом вал, малы ке шуоно туж серемес, шудон сямен ортче вал котькуд урок. Кин ке юан сётоз. Мае ке йырады пыртӥды-а шуыса? Ваньзэ пыртӥм, ваньзэ тодӥм, ваньзэ лыдӟим. Трос тодон, мон ачим сярысь, лыктэ шудон сямен ке сое ортчыто, сёто. Тунсыкогес озьы луэ, пиналъёс но урокъёсын уг изё вал. Котькуд урок ортче вал, вал, табере ини вал, туж пайдаё, туж тунсыко.